ಇರುವಂತಿಗೆ (ಕವನ ಸಂಕಲನ)

            ಇರುವಂತಿಗೆ (ಕವನ ಸಂಕಲನ)

        ೧.ನನ್ ಲಚ್ಚಿ.

ಹಾಗೇ ನೋಡ್ತಾ ನೋಡ್ತಾ ಹೋದ್ರೆ

ನನ್ ಲಚ್ಮೀನೆ ಒಳ್ಳ್ಯೋಳು |

ಘಟ್ಟ್ಯಾಗೇನೊ ಮಾತಾಡ್ತಾಳೆ

ಆದ್ರೂನೂವೆ ಒಳ್ಳ್ಯೋಳು ||

ಅವ್ಳೂ ಬಂದು ಸಿದ್ದೇ ಎಡ್ವಿ

ಹದ್ನಾರ್ ವರ್ಷ ಹಾರ್ಹೋಯ್ತು |

ಸೇತ್ವೇ ಕೆಳ್ಗೆ ಕಲ್ಮಣ್ ಮುಚ್ಚಿ

ಹೊನ್ನೀರ್ ಕಾಲ್ವೆ ತುಂಭೋಯ್ತು ||

ತುಂಬಿದ್ ಕಾಲ್ವೆ ತೋಟಕ್ ನುಗ್ಗಿ

ಚಿನ್ನದ್ ಸೊಪ್ನಾ ಸುರ್ದಿತ್ತು |

ಬೇಲೀ ಸುತ್ತಾ ಹೂವಿನ್ ಸುಗ್ಗಿ

ಜೀವದ್ ಕಣ್ಣೇ ತೆರ್ದಿತ್ತು ||

ಹಳ್ಳ್ಯೋಳೂಂತಾ ಅನ್ನೋರನ್ಲಿ

ಒಳ್ಳೇ ಹೆಂಡ್ತಿ ನನ್ ಲಚ್ಮಿ |

ಬೆಳ್ ಬೆಳ್ ಗಿದ್ದೋರ್ ಬೆಳ್ಕೋಂಡ್ ಬರ್ಲಿ

ಪಚ್ಚೇ ಬಳ್ಳಿ ನನ್ ಲಚ್ಮಿ ||

ತೊಟ್ಲೂ ಬಟ್ಲೂ ತಂದೋರ್ಯಾರು

ಅವ್ಳೇ ತಾನೆ ನನ್ ಲಚ್ಮಿ |

ಬಿಸ್ಲಲ್ ಮಳೇಲ್ ನಕ್ಕೋರ್ಯಾರು

ನೊಂದೋರ್ಯಾರು ನನ್ ಲಚ್ಮಿ ||

ಹನ್ನೊಂದ್ ಘಂಟೇಗನ್ನಾ ಹಾಕಿ

ಕಾಪಾಡೋಳೇ ನನ್ ಲಚ್ಮಿ |

ಮಕ್ಕಳ್ನೆಲ್ಲಾ ತೂಗಿ ಸಾಕಿ

ಬೆಳ್ಸೋ ದೇವ್ರೆ ನನ್ ಲಚ್ಚಿ ||

ಜೊತೇಲ್ ಬಂದು ಮರ್‍ಏಲ್ ನಿಂತು

ನನ್ನೇ ನೋಡ್ತಾಳ್ ನನ್ ಲಚ್ಚಿ |

ಮೋಡಲ್ ಮರೇಲ್ ಮುಂಗಾರ್ ಮಿಂಚು

ಹಾಡಿನ್ ತುಂಬಾ ನನ್ ಲಚ್ಮಿ ||

             ೨.ಅನ್ನದ್ ತಪ್ಲೆ.

ಹುಟ್ಟಿದ್ ಮಳೇ ಹಾಳಾಗ್ ಹೋಯ್ತು,

ಸುಮ್ನೆ ಗುಡುಗಿನ್ ಕೋಡಿ.-

ಅಕ್ಕಿ ಬೆಲೇ ಏರ್ತಾ ಹೋಯ್ತು

ದುಡ್ಡಿನ್ ಮೊಕಾ ನೋಡಿ.

ಅಕ್ಕೀಗಿಂತ ಅಲ್ಲಿದ್ ಕಲ್ಲೆ

ಮುತ್ನಂಗಿತ್ತು, ತಣ್ಗೆ !

ಕಟ್ಕೊಂಡೋಳ್ಗಿಂತಿಟ್ಕೊಂಡೋಳೇ

ಸುಂದ್ರೇ ಅಲ್ವೆ ಕಣ್ಗೆ !

ಒಲೇ ಕುರ್ಚೀಲನ್ನದ್ ತಪ್ಲೆ

ತಲೆ ತೂಗ್ತಾ ಇತ್ತು ;

ಅಕ್ಕೀ ಮೊಕಾ ನೋಡಿದ್ ಕೂಡ್ಲೆ

ಕುಣ್ಯೋದ್ ನಿಂತೇಹೋಯ್ತು !

ಅಕ್ಕಿ ಮೊಕಾ ಚಿಕ್ದಾಗ್ ಹೋಯ್ತು

ತಂದೋರ್ ತೊಂದ್ರೆ ನೋಡಿ ;

ನಕ್ಕೋರ್ ಮೊಕ ಮೂರ್ಕಾಸಾಯ್ತು

ಇದ್ದೋರ್ ಸಂಕ್ಟಾ ನೋಡಿ.

ಒಲೇ ಊದಿ - ತಲೇಗ್ ಬೂದಿ -

ಅಂತೂ 'ಅನ್ನಾ' ಅಂದ್ರು ;

ಕಸಾ ಗುಡ್ಸೀ ತಟ್ಟೇ ಹಾಕೀ

ಉಟಕ್ಕೆಲ್ಲಾ ಬಂದ್ರು.

ತೊಂಬತ್ತೊಂಬತ್ ಅಕ್ಕಿ ಬೆಂದ್ರೂ

ಬೆಂದಿರ್ಲಿಲ್ಲ ಕಲ್ಲು !

ಉಣ್ತಾ ಇದ್ದೋರ್ ಹೊಡಿಯಾಕ್ ಬಂದ್ರೂ..

ಕಲ್ - ಕಡಿದಿತ್ತು ಹಲ್ಲು !